Ar ôl 14 mlynedd hir o fethiant y Ceidwadwyr ar yr economi, mae angen newid ar Brydain. Chwalodd y Torïaid yr economi – trethi i fyny, prisiau i fyny, safonau byw i lawr – ac mae gweithwyr yn dal i dalu’r pris.

Mae gan Lafur gynllun i gael Prydain yn ôl ar ei thraed. Mae eich Llywodraeth Lafur Cymru eisoes yn adeiladu economi Gymreig gryfach, wyrddach yn seiliedig ar egwyddorion gwaith teg a chynaliadwyedd, a chyda llywodraeth Lafur yn San Steffan gallwn fynd hyd yn oed ymhellach. Bydd llywodraeth Lafur y DU yn sicrhau twf ledled y DU, gyda phopeth a wnawn wedi’i adeiladu ar graig cyfrifoldeb economaidd.

Mae teuluoedd yng Nghymru yn talu’r pris am fethiant y Torïaid ar filiau ynni. Mae cyllidebau cartrefi’r DU wedi cael eu taro’n galetach gan yr argyfwng ynni nag unrhyw wlad ddatblygedig fawr.

Llafur yn unig sydd â chynllun i dorri biliau, creu swyddi a sicrhau diogelwch ynni Prydain unwaith ac am byth. Bydd llywodraeth Lafur y DU yn rhoi hwb i gynlluniau sydd eisoes ar y gweill yng Nghymru i fuddsoddi mewn seilwaith ynni adnewyddadwy a sicrhau bod yr elw ynni a grëir yng Nghymru yn aros yng Nghymru.

Er gwaethaf 14 mlynedd o gamreolaeth gan y Torïaid – gan gynnwys effaith ddinistriol degawd o lymder – mae Llafur Cymru wedi parhau i fuddsoddi mewn iechyd a gofal cymdeithasol yng Nghymru a’u diogelu.

Mae eich Llywodraeth Lafur Cymru wedi cadw presgripsiynau am ddim i bawb yng Nghymru, wedi sicrhau mynediad gwell a chyflymach at driniaethau newydd drwy’r Gronfa Triniaethau Newydd arloesol ac mae’n buddsoddi yng ngweithlu GIG y dyfodol. Gyda llywodraeth Lafur y DU yn San Steffan, byddwn yn parhau i flaenoriaethu gwariant ar wasanaethau iechyd a gofal.

Ni ellir ymddiried yn y Torïaid i gadw ein cymunedau’n ddiogel. Ar eu gwyliadwriaeth mae plismona yn y gymdogaeth wedi’i gau allan ac mae dros 90% o droseddau’n mynd heb eu datrys, gan adael mwy a mwy o droseddwyr i gerdded yn rhydd a dioddefwyr heb gyfiawnder.

Mae Llafur yn credu mai teimlo’n ddiogel yw’r sylfaen ar gyfer adeiladu cyfleoedd, a dyna pam y bydd llywodraeth Lafur y DU yn rhoi ein cynllun difrifol ar waith i wneud strydoedd Cymru yn ddiogel – haneru troseddau treisgar difrifol o fewn degawd, mynd i’r afael ag ymddygiad gwrthgymdeithasol a rhoi mwy o heddlu ar y rhawd.

Boed yn fuddsoddi yn y rhaglen adeiladu ysgolion a cholegau newydd fwyaf ers y 1960au, neu’n parhau i gyflawni ein hymrwymiad hirsefydlog i ddarparu brecwast ysgol am ddim i bob disgybl ysgol gynradd, mae Llafur Cymru wedi ymrwymo i ddatgloi cyfleoedd i bawb yng Nghymru.

Gyda llywodraeth Lafur y DU yn San Steffan, yn gweithio gyda – nid yn erbyn – eich Llywodraeth Lafur Cymru yma yng Nghymru, gallwn fynd hyd yn oed ymhellach, gan barhau i fuddsoddi mewn polisïau sy’n chwalu’r rhwystrau sy’n dal pobl yn ôl ac yn sicrhau bod pawb yn gallu dod ymlaen mewn bywyd, waeth beth fo’u cefndir.